ഇന്ത്യയിലെ ക്വിക്ക് കൊമേഴ്സ് പ്ലാറ്റ്ഫോമുകളിലെ രണ്ടാം സ്ഥാനത്തിനായി തര്‍ക്കം തുടര്‍ന്ന് സ്വിഗ്ഗിയും സെപ്റ്റോയും. സെപ്റ്റോയാണ് ക്വിക്ക് കൊമേഴ്സില്‍ രണ്ടാം സ്ഥാനം നേടിയിരിക്കുന്നതെന്ന് സമീപകാലത്ത് ചില റിപ്പോര്‍ട്ടുകള്‍ വന്നിരുന്നു. എന്നാല്‍ ഇതിനെ പൂര്‍ണമായി തള്ളികൊണ്ട് സ്വിഗ്ഗി രംഗത്തെത്തി. അടിസ്ഥാനരഹിതമായ റിപ്പോര്‍ട്ടാണ് പുറത്ത് വന്നിരിക്കുന്നതെന്നും സ്വിഗ്ഗി അവകാശപ്പെടുന്നു.
സ്വിഗ്ഗിയുടെ ക്വിക്ക് കൊമേഴ്സ് പ്ലാറ്റ്ഫോമായ ഇന്‍സ്റ്റാമാര്‍ട്ട് തന്നെയാണ് രണ്ടാം സ്ഥാനത്ത് എന്നാണ് കമ്പനി അവകാശപ്പെടുന്നത്. പുറത്ത് വന്ന റിപ്പോര്‍ട്ടുകളില്‍ പരാമര്‍ശിക്കുന്ന റെഡ്സീറിന്റെ ഡാറ്റയും വ്യാജമായി നിര്‍മിച്ചിരിക്കുന്നതാണെന്ന് സ്വിഗ്ഗി അവകാശപ്പെടുന്നു. റെഡ്‌സീറും സ്വിഗ്ഗിക്കെതിരായ റിപ്പോര്‍ട്ടുകള്‍ വ്യാജമാണെന്ന് സ്ഥിരീകരിച്ച് രംഗത്തെിയിട്ടുണ്ട്.
മണി കണ്‍ട്രോള്‍ പ്രസിദ്ധീകരിച്ച ലേഖനം തങ്ങളുടെ ശ്രദ്ധയില്‍പ്പെട്ടിട്ടുണ്ടെന്നും തങ്ങള്‍ അത്തരത്തിലൊരു ഡാറ്റയും മണികണ്ട്രോളിനോ എച്ച്എസ്ബിസിക്കോ നല്‍കിയിട്ടില്ലായെന്നും റെഡ്‌സീര്‍ വ്യക്തമാക്കി. നിലവില്‍ സൊമാറ്റോയുടെ ഉടമസ്ഥതയിലുള്ള ബ്ലിങ്കിറ്റാണ് ക്വിക്ക് കൊമേഴ്സ് ആപ്പുകളില്‍ ഒന്നാം സ്ഥാനത്ത് തുടരുന്നത്.
Content Highlights- Zepto and Swiggy continue their fight for second place among quick commerce platforms